Во периодот од 30-ти март до 2-ри април, во Скопје и на Архитектонскиот факултет, УКИМ во Скопје во студиска посета престојуваше група од 35 студенти, тројца професори и тројца докторанти. Студентите и професорите се дел од архитектонското студио во четврта година на Одделот за архитектура и дизајн на Политехничкиот универзитет во Торино кое работи на темата на урбанистичко планирање и архитектонско проектирање на урбаниот кварт Ј14-Расадник во општина Кисела Вода. Целта на посетата беше запознавање со градот Скопје, особено со локацијата која е во фокусот на работата на студиото во општина Кисела Вода, градот во целина, како и со работата на студијата и студентите на Архитектонскиот факултет.

Студентите и професорите од Торино на 31 март го проследија предавањето на деканот проф. д-р Огнен Марина за развојот на Скопје, а на 1-ви април, во амфитетатрот на факултетот ги проследија презентациите на студентските проекти изработени во рамките на Интегративното студио „Раст 2.0“ под раководство на проф. д-р Слободан Велевски и проф. д-р Марија Мано Велевски. Гостите од Торино ја посетија и општина Кисела Вода каде остварија средба со градоначалникот на општината Орце Ѓорѓиевски и претставниците на општината. На средбата во општината, гостите од Торино имаа можност да се запознаат со деталите за актуелниот меѓународен конкурс за идејно решение на градската четврт Расадник, како и потребите и очекувањата на општината оваа урбана заедница да добие лик кој ќе ја идентификува како хуман кварт за живеење. На средбата присуствуваше и заменик Амбасадорот на Италија во Македонија, Марио Де Роса.

Студиската посета е во рамките на долгогодишната и богатата соработка помеѓу Архитектонскиот факултет, УКИМ во Скопје и Одделот за архитектура и дизајн на Политехничкиот универзитет во Торино која ќе продолжи и во иднина, како во делот на високобразовниот процес, така и во рамките на научната и апликативната работа во интерес на заедницата и граѓаните.

Фотографиите се на Мила Гаврилоска и од Општина Кисела Вода.