Во четврток на 30.10. 2025 со почеток во 11 часот во Амфитеатарот на АФС во рамките на наставата по предметот Архитектонско проектирање 2, проф. д-р Ѓоко Муратовски ќе одржи предавање насловено „Дизајн и архитектура во свет што се менува“. 

                                                     Во денешниот брзо променлив свет, дизајнот одамна ја надмина естетиката и стана двигател на иновации и општествена трансформација. Во ова предавање, проф. д-р Ѓоко Муратовски ќе повлече паралели меѓу дизајнот и архитектурата, истражувајќи како двете дисциплини се потпираат на истражување, креативност и стратешко размислување за да создадат значајни резултати. Преку примери од својата глобална кариера во областа на дизајнот, академијата, бизнисот и владините институции, тој ќе објасни зошто праксата заснована на истражување е клучна за дизајнерите и архитектите што настојуваат да останат релевантни, конкурентни и влијателни во свет кој постојано се менува.
Проф. Др. Ѓоко Муратовски е наградуван дизајнер, истражувач и консултант за иновации кој соработува со универзитети, компании од Fortune 500 листата и различни влади низ целиот свет. Тој е поканет да биде член на бројни организации со водечко влијание, како што се Frank Lloyd Wright’s Fallingwater Institute, Forbes Councils, Stanford Institute for Innovation in Developing Economies, Oxford University Society, Oxford Digital Leaders Network, Yale Higher Education Leadership Summit и програмата на Белата куќа – Presidential Innovation Fellows. Тој исто така е главен директор за иновации (Chief Innovation Officer) во италијанската консултантска компанија за автомобилски дизајн Icona Design Group, чии клиенти вклучуваат брендови како Lamborghini, Alfa Romeo, Maserati и многу други.